Sədərək Rayon Təhsil Şöbəsinin təşkilatçılığı ilə Heydərabad qəsəbə tam orta məktəbində rayon ümumtəhsil məktəbləri arasında “8 Noyabr-Zəfər Günü”nə həsr edilmiş “Zəfərə gedən yol” adlı bilik yarışı keçirilmişdir. Yarışda rayon ümumtəhsil məktəblərinin IX-XI sinif şagirdləri komandalar şəklində iştirak ediblər.

"NAXÇIVANXƏBƏRLƏRİ" məlumat verir ki, tədbirdən öncə torpaqlarımızın azadlığı uğrunda canlarından keçmiş şəhidlərimizin xatirəsi bir dəqiqəlik sükutla yad edilmişdir. Heydərabad qəsəbə tam orta məktəbin direktoru Bulud Bağırlı çıxış edərək yarışın keçirilməsinin məqsədi barədə məlumat vermiş, Azərbaycan Respublikasının Prezidenti İlham Əliyevin gənc nəslə xüsusi diqqət yetirdiyindən, onlara hər bir sahədə göstərilən qayğıdan və respublikada dövlət gənclər siyasətinin uğurlu inkişafından danışmış və “Zəfər günü” münasibətilə iştirakçıları təbrik edərək onlara uğurlar arzulayıb.

Yarışın nəticəsinə görə Sədərək kənd 2 nömrəli tam orta məktəbin “Qapıcıq” komandası I yerə, Sədərək kənd 1 nömrəli tam orta məktəbin “Şuşa” komandası II yerə və Qaraağac kənd tam orta məktəbin “Xarı bülbül” komandası isə III yerə layiq görülüb.

Sonda fərqlənmiş komandalar Təhsil şöbəsinin diplom və medalları ilə təltif olunub.