Azərbaycan Konstitusiyası qəbul olunandan bu yana ölkənin keçdiyi inkişaf yolu Avropa dövlətləri və ABŞ-nin vaxtilə 100 ilə keçdiyi inkişaf yoluna bərabərdir 

"NAXÇIVANXƏBƏRLƏRİ" məlumat verir ki, bunu Dövlət Təhlükəsizliyi Xidmətinin (DTX) Heydər Əliyev adına Akademiyasının rəisi Elşad Nəsirov Milli Məclisdə “Ümummilli Lider Heydər Əliyev müstəqil Azərbaycan Konstitusiyasının müəllifidir” mövzusunda keçirilən elmi-praktik konfransda çıxışı zamanı deyib.

E.Nəsirov bildirib ki, 4-cü nəsil konstitusiyalar içərisində Azərbaycan Konstitusiyası digər konstitusiyalarla qarşılıqlı müqayisə edəndə görürük ki, istənilən sahədə kifayət qədər təkmildir:

"Tələbələr sual verirdilər ki, necə oldu ki, ABŞ konstitusiyası 1787-ci ildə qəbul edilib və bu günə kimi həmin konstitusiyaya sadəcə, 27 əlavə edilib. Bu əlavələrdən də ilk 10-u 18-ci əsrin sonlarında qəbul olunub. Yerdə qalan 17 əlavənin isə bir neçəsi o qədər də önəmli deyil. Bu qədər müddət ərzində ABŞ konstitusiyasına 27 əlavə edilib, amma Azərbaycan Konstitusiyası bu qədər çox dəyişikliyə məruz qalıb.

Konstitusiyamız qəbul olunandan bu yana ölkəmizin keçdiyi inkişaf yolu Avropa dövlətləri və ABŞ-nin vaxtilə 100 ilə keçdiyi inkişaf yoluna bərabərdir. Azərbaycanın bu iki onilliyi həmin dövlətlərin 100 illik inkişaf dövrünə bərabərdir".

E.Nəsirov ölkədə proporsional seçki sisteminin yenidən tətbiqi üçün müəyyən şəraitin yarana biləcəyini də vurğulayıb:

"Proporsional sistem demokratiyanın yaranmasına, siyasi hakimiyyətin xalqdan, seçicidən ayrılmasına önəm verən sistemdir. Müəyyən şərait yetişə bilər ki, biz proporsional sistemə yenidən qayıda bilərik. Amma bu günün tələbi məhz majoritar sistemə keçidlə bağlı idi”.