Babək Rayon Mədəniyyət Sarayında Babək Rayon Mədəniyyət İdarəsinin tabeliyində çalışan əməkdaşların iştirakı ilə Məhəmmədhüseyn Şəhriyarın anım günü ilə əlaqədar “Azərbaycan ədəbiyyatında Şəhriyar zirvəsi” başlığı altında tədbir keçirilib.

NAXCİVANXEBERLERİ.COM məlumat verir ki, tədbiri giriş sözü ilə Babək Rayon Mədəniyyət İdarəsinin müdiri Fətəli Axundzadə açaraq bildirib ki, 13 mart 1996-cı ildə ulu öndər Heydər Əliyev Azərbaycan ədəbiyyatının inkişafında böyük xidmətləri olan Məhəmmədhüseyn Şəhriyarın anadan olmasının 90 illik yubileyinin keçirilməsi haqqında Sərəncam imzalayıb.
Azərbaycanın ədəbi-mədəni həyatında müstəsna rolu olan Məhəmmədhüseyn Şəhriyarın 90 illik yubileyi təntənəli şəkildə qeyd olunub. Şəhriyar klassik şeirin bütün şəkillərində yazıb, ədəbiyyatı yüksək məzmunlu qəzəl, qəsidə, məsnəvi, qitə və rübailərlə zənginləşdirib.

Tədbirdə filologiya üzrə fəlsəfə doktoru, dosent, AMEA Naxçıvan Bölməsinin əməkdaşı Ramiz Qasımov və “Şərq qapısı” qəzetinin müxbiri Fariz Əhmədov M.Şəhriyarın həyat və yaradıcılığı haqqında məlumat veriblər.

Tədbirin bədii hissəsində Babək Rayon Mədəniyyət İdarəsinin tabeliyində çalışan əməkdaşlar tərəfindən Məhəmmədhüseyn Şəhriyarın şeirləri bədii qiraət edilib, həyatı haqqında kompazisiya nümayiş etdirilib və musiqi nömrələri səsləndirilib.