Bu gün mədəniyyət müəssisələrində bir sıra rəhbər və ümumi vəzifələrə işə qəbul üçün elan olunmuş müsabiqənin müsahibə mərhələsi başlayıb.

NAXCİVANXEBERLERİ.COM məlumat verir ki, Naxçıvan Muxtar Respublikasının Mədəniyyət Nazirliyinin sistemində fəaliyyət göstərən mədəniyyət müəssisələrində bir sıra rəhbər və ümumi vəzifələrə işə qəbul üçün 29 yanvar 2024-cü il tarixdə elan olunmuş müsabiqənin müsahibə mərhələsi başlayıb. Müsahibə 23-30 aprel 2024-cü il tarixləri arasında Naxçıvan Muxtar Respublikası Mədəniyyət Nazirliyinin inzibati binasında keçiriləcək. Müsahibə mərhələsidə, ümumilikdə 152 nəfərin iştirakı nəzərdə tutulub.

Müsabiqə mərhələsində 20  dəqiqə ərzində namizədlərin peşəkarlıq qabiliyyətləri, şəxsi keyfiyyətləri və ümumi dünyagörüşü müsahibə proqramına uyğun olaraq komissiya tərəfindən yoxlanılır. Komissiya müsahibə zamanı namizədləri müvafiq meyarlar əsasında 5 ballıq  sistem əsasında qiymətləndirilir. Namizədlər meyarlar üzrə ortalama 3 bal topladıqda bu mərhələni uğurla keçmiş sayılır.

Müsabiqənin nəticəsi barədə məlumat müsahibənin keçirildiyi gündən 1 iş günü müddətində Nazirliyin rəsmi səhifəsində (nculture.gov.az) paylaşılacaq. Namizədlər imtahana gələrkən şəxsiyyət vəsiqələrini, dövlət nümunəli təhsil sənədinin (diplomun) və ya ali (orta ixtisas) təhsili müəssisəsini bitirmə haqqında sənədi özləri ilə birlikdə gətirməlidirlər. Namizədlər imtahanın keçiriləcəyi binaya qrafikdə qeyd olunan vaxtdan ən azı 30 dəqiqə əvvəl gəlməlidir.

Müsahibədə iştirak edəcək namizədlər müsahibə qrafiki ilə https://nculture.gov.az/i-s-q-bul linki vasitəsilə tanış ola bilərlər:

Namizədlər, həmçinin qeyd olunan linkə Nazirliyin saytı və İnstagram səhifəsinin status bölməsindən də daxil ola bilərlər.

Mənsurə Hümbətova