Dekabrın 18-də Şahbuz Rayon Mədəniyyət Sarayında Şahbuz Rayon Xalq Teatrı İsi Məlikzadənin "Subaylarınızdan Görəsiniz" komediyası əsasında hazırladığı tamaşanı teatrsevərlərə təqdim edib.

"NAXÇIVANXƏBƏRLƏRİ" məlumat verir ki, tamaşanın səhnə quruluşunu Şahbuz Rayon Mədəniyyət Sarayının bədii rəhbər-rejissoru Bayram Bağırov verib. Quruluşçu rəssam Səadət Abdinova, musiqi tərtibatçısı isə Muxtar Bağırov olub.

Səhnə əsərində rolları Bayram Bağırov, Səadət Abdinova, Elbəyi Qəhrəmanov, Amil Əsgərov, İlahə Səfiyeva, Tahirə Hacıyeva, Allahverdi Yolçuyev və Səfər Həziyev canlandırıblar.

Tamaşanın əsas süjet xətti iki qonşu ailə arasındakı gərgin münasibətlər üzərində qurulub. Seyfi və Səməni, oğulları Mailin nişanının qaytarılması məqsədilə Əlipaşanın evinə gəlir və tərəflər arasında mübahisə yaranır. Hadisələrin gedişində Mail səhvən Qəndabın yerinə Çiçəyi qaçırır. Lakin sonradan Mail və Çiçək arasında sevgi münasibətləri formalaşır. Bu vaxt Seyfi və Səməninin qızı Qəndab isə Bakıda yaşayan sevgilisi Fəqanla evlənir.

Tamaşa böyük maraqla qarşılanıb və tamaşaçılar tərəfindən alqışlarla müşayiət olunub.