![Əməkdar artist beynəlxalq teatr şənliyinə qatılıb -](http://admin.naxcivanxeberleri.com/storage/uploads/images/blog/emekdar-artist-beynelxalq-teatr-senliyine-qatilib-1721032211.jpg)
Əməkdar artist beynəlxalq teatr şənliyinə qatılıb - FOTO
Cəlil Məmmədquluzadə adına Naxçıvan Dövlət Milli Dram Teatrının direktor müavini , Naxçıvan Muxtar Respublikasının əməkdar artisti Səməd Canbaxşiyev 9-cu Beynəlxalq Dionis Teatr Şənliyi və Təlim Düşərgəsində iştirak edib.
9 ildir ki teatr sahəsi üzrə mütəxəssis, aktyor, pedaqoq, rejissor Rasim Aşın tərəfindən Türkiyənin Manisa rayonunun Sart-Sardes qəsəbəsində təşkil edilərək keçirilən şənliyə Türkiyə ilə yanaşı Azərbaycandan və İrandan da mütəxəssislər, sənət adamları, pedaqoqlar, teatr kollektivləri, peşəkar və həvəskar aktyorlar qatılıb.
"NAXÇIVANXƏBƏRLƏRİ" məlumat verir ki, Azərbaycan teatrını burada təmsil edən Səməd Canbaxşiyev Daş səhnədə və qədim Artemis məbədinin qalıqları arasındakı meydanda tamaşaçılar önündə çıxış edib.
Qədim türk aktyor sənətinin meydan tamaşasının nümunəsi olan məddah üslubunda hazırladığı oyunda Azərbaycan-Türkiyə teatrlarının arasında münasibətlər, oxşar və fərqli cəhətlər, Naxçıvanın muxtariyyətinin əldə olunmasında 100 il əvvəl Azərbaycanın ozamanki rəhbərliyi, siyasi xadimləri ilə yanaşı Mustafa Kamal Atatürkün və türkiyəli diplomatların gördüyü işlər, Kazım Qarabəkir Paşanın Naxçıvan teatrı ilə əlaqələrindən danışıb.
Əməkdar artist, həmçinin V. Hüqonun “Edama məhkumun son günü” əsəri əsasında Naxçıvan teatrında Mir Qabil Əkbərovun quruluş verdiyi tamaşadan bir hissəni də geniş auditoriyaya təqdim edib. Ayaq üstə alqışlanan oyun iştirakçıların sosial şəbəkə hesabları üzərindən geniş şəkildə yayımlanıb. Sonda Səməd Canbaxşiyevə təşəkkürnamə təqdim edilib. Bundan başqa, Səməd Canbaxşiyev türkiyəli teatr mütəxəssislərin təşkil etdiyi “Ssenari yazma ustalığı”, “Absurd teatr nədir?”, “Aktyor oyununda yaşama və göstərmə”, “Məddah oyununda ustalıq”, “Teatrda səs və işıq” və başqa mövzularda təlimlərə də qatılıb.
Qeyd edək ki, teatrın ilk dəfə məhz bu yerlərdə, qədim Lidiyanın paytaxtı olan Sart-Sardesdə yarandığı araşdırmaçılar tərəfindən isbatlanıb. Burada olan Artemis məbədinin qalıqları, qədim Gimnazium binası, yeni aşkar edilən nəhəng amfiteatr qalıqları və bir çox tarixi abidələr məkanın bir zamanlar sivilizasiya və sənət mərkəzi olduğunu göstərir. Ona görə də hər il Sart-Srdesdə qədim dövrlərdə incəsənət, bolluq, xaos və şərab tanrısı sayılan Dionisin şərəfində teatr şənliyi keçirilir. “Çadırını al və gəl” prinsipi ilə keçirilən teatr təlimi və yaradıcılıq şənliyi ictimaiyyət tərəfindən maraqla qarşılanır. Naxçıvan Dövlət Milli Teatrının kollektivi keçən il də bu tədbirə qatılaraq M.Ü. Görgülünün “Cibimizdəki dəilik” tamaşasını oynamışdı.