Azərbaycan Respublikasının Prezidenti İlham Əliyev noyabrın 14-də Braziliya Federativ Respublikasının vitse-prezidenti Jeraldu Alkmin ilə görüşüb.

"NAXÇIVANXƏBƏRLƏRİ" məlumat verir ki, Jeraldu Alkmin Braziliya Prezidentinin salamlarını dövlət başçısına çatdırıb, Luiz İnasio Lula da Silvanın səhhəti ilə əlaqədar COP29-da iştirak edə bilmədiyini qeyd edib.

Dövlət başçısı salamlara görə minnətdarlığını bildirib, onun da salamlarını Braziliya Prezidentinə çatdırmağı xahiş edib, Luiz İnasio Lula da Silvanın tezliklə sağalmasını arzulayıb.

Prezident İlham Əliyev Braziliya dövlətinin başçısını Azərbaycana rəsmi səfərə dəvət edib.

Bakının gözəlliyinin onlarda xoş təəssürat hissi yaratdığını deyən qonaq COP29-un yüksək səviyyədə təşkil edilməsi və uğurlu təşkilatçılıq münasibətilə təbriklərini çatdırıb.

Jeraldu Alkmin Azərbaycanın və Braziliyanın “Troyka” çərçivəsində COP və iqlim dəyişmələri ilə bağlı əməkdaşlığına toxunub. O, Azərbaycanla ikitərəfli münasibətlərin, həmçinin iqtisadi-ticari, kənd təsərrüfatı, sərmayələr sahələrində əlaqələrin inkişafına böyük əhəmiyyət verdiklərini deyib.

Söhbət zamanı iqtisadi-ticari məsələlər üzrə işçi qrupun yaradılması, sərmayələr, birgə istehsal müəssisələri, turizm, birbaşa hava əlaqələrinin qurulması ilə bağlı fikir mübadiləsi aparılıb.