Naxçıvan Muxtar Respublikası səhiyyə naziri Samiq Sadıxov bu gün Sədərək Rayon İcra Hakimiyyətinin inzibati binasında vətəndaş qəbulu həyata keçirib.

"NAXÇIVANXƏBƏRLƏRİ" məlumat verir ki, əvvəlcə səhiyyə naziri Samiq Sadıxov və Sədərək Rayon icra başçısı Naim Cahidzadə ümummilli lider Heydər Əliyevin abidəsi önünə gül dəstələri qoyaraq əziz xatirəsini ehtiramla yad ediblər. Daha sonra Samiq Sadıxov Sədərək Rayon İcra Hakimiyyətinin inzibati binasında vətəndaşları qəbul edib. Qəbulda nazirliyin aidiyyəti struktur bölmələrinin rəhbərləri də iştirak edib. Qəbul zamanı vətəndaşların müayinə və müalicə, dərman təminatı, əlilliyin təyini və digər məsələlərlə bağlı müraciətləri dinlənilib və bir sıra məsələlər yerindəcə həll olunub.

Digər müraciətlərin araşdırılması və qanunvericiliyə uyğun baxılması məqsədilə aidiyyəti struktur bölmələrinin rəhbərlərinə müvafiq tapşırıqlar verilib.

Qeyd edək ki, qəbul zamanı 25 nəfərin müraciətinə baxılıb.