SON DƏQİQƏ

naxcivanxeberleri.com

Milli Məclisin Əmək və sosial siyasət komitəsinin iclası keçirilib

Milli Məclisin Əmək və sosial siyasət komitəsinin iclası keçirilib
28-09-2022, 17:42

Milli Məclisin Əmək və sosial siyasət komitəsinin 2022-ci ilin payız sessiyasında növbəti iclası keçirilib.

NAXCİVANXEBERLERİ.COM-un məlumatına görə, iclası açan komitənin sədri Musa Quliyev gündəlik barədə məlumat verib. 4 məsələdən ibarət gündəlik təsdiq edildikdən sonra birinci məsələnin müzakirəsi başlanıb.

Musa Quliyev müzakirəyə çıxarılan “Əmək pensiyaları haqqında” Qanunda dəyişiklik edilməsi barədə qanun layihəsi (birinci oxunuş) ilə bağlı qısa məlumat verib. Qanun layihəsini pensiya islahatlarının davamı kimi xarakterizə edən komitə sədri qeyd edib ki, təklif olunan dəyişikliklər əsasən pensiya artımlarının vahid indeksasiyası metodunun tətbiqinin genişləndirilməsi və müvafiq icra hakimiyyəti orqanı tərəfindən əmək pensiyaçılarına edilən maddi yardımın pensiyaya əlavə edilməsi istiqamətləri üzrə hüquqi bazanın yaradılmasını özündə ehtiva edir.

Layihənin pensiya təminatı sistemində sosial sığorta prinsipinin daha da möhkəmləndirilməsinə, pensiyaların inflyasiyanın mənfi təsirlərindən qorunmasına xidmət etdiyi vurğulanıb. Təklif olunan vahid indeksasiya metoduna keçidlə bağlı dəyişikliklərə əsasən, bütün növ əmək pensiyalarının məbləğləri hər il vahid qaydada indeksləşdirilərək artırılacaq, eyni zamanda pensiya sahəsində tam elektronlaşdırma mümkün olacaq.

Sonra əmək və əhalinin sosial müdafiəsi nazirinin müavini Anar Kərimov qanun layihəsi haqqında arayış verərək təklif olunan dəyişikliklərin uzunmüddətli dövr üzrə pensiya sisteminin maliyyə dayanıqlığının artırılmasına xidmət etməsindən danışıb, xüsusi şərtlərlə pensiya alan pensiyaçıların pensiyalarının indeksləşdirilməsi mexanizmlərinin tətbiqinin üstünlüklərindən bəhs edib, həmçinin elektronlaşmanın genişləndirilməsi üçün yaratdığı imkanları diqqətə çatdırıb.

İclasda gündəliyin ikinci və üçüncü məsələləri ilə bağlı Milli Məclis Aparatının Sosial qanunvericilik şöbəsinin müdiri Adil Vəliyev məlumat verib. O, Əmək Məcəlləsində dəyişiklik edilməsi haqqında qanun layihəsinin (birinci oxunuş) beynəlxalq konvensiyalara, Sosial Hüquqlar üzrə Avropa Komitəsinin, eləcə də BƏT-in tövsiyələrinə uyğun olmasını qeyd edərək dəyişikliklərə əsasən, mövcud qanunvericilikdə qadınların əməyi qadağan olunan 674 peşə (vəzifə) və iş yerinin azaldılaraq 204-ə qədər endirildiyini bildirib. Eyni zamanda, qadağan edilən bu peşə (vəzifə) və iş yerlərinin bütün qadınlara deyil, yalnız hamilə və ya bir yaşınadək uşağı olan qadınlara aid olacağını vurğulayıb. Diqqətə çatdırılıb ki, nəticədə, kişi və qadınlara bərabər rəftar və bərabər məşğulluq imkanlarının yaradılmasında əsaslı dönüş yaranacaq, ölkə üzrə qadınların orta əmək haqlarının kişilərin orta əmək haqqına daha da yaxınlaşması təmin ediləcək.

Adil Vəliyev gündəliyin üçüncü məsələsi olan Vergi Məcəlləsində, “Sosial sığorta haqqında”, “Bələdiyyələrin maliyyəsinin əsasları haqqında”, “Tibbi sığorta haqqında” və “Daşınar əmlakın yüklülüyü haqqında” qanunlarda dəyişiklik edilməsi barədə qanun layihəsi (birinci oxunuş) ilə bağlı bildirib ki, sənəd Vergi Məcəlləsində dəyişiklik edilməsi haqqında 3 dekabr 2021-ci il tarixli 406-VIQD nömrəli qanuna uyğun olaraq hazırlanıb.

Qeyd olunub ki, layihədə əsasən iki kateqoriya üzrə - Vergi Məcəlləsinin 220.10-cu və 218.4.1-ci maddələrində nəzərdə tutulan fəaliyyət növləri ilə fərdi qaydada məşğul olan fiziki şəxslərin icbari tibbi sığorta ilə əhatə olunması nəzərdə tutulub.

Gündəliyin sonuncu məsələsi olan “Avropa Sosial Xartiyasının təsdiq edilməsi barədə”, “Əlillərin hüquqları haqqında” Konvensiyaya qoşulmaq barəsində”, “Əlillərin hüquqları haqqında” Konvensiyanın Fakültativ Protokoluna qoşulmaq barəsində”, “Dərc olunmuş əsərlərin kor, görmə qüsurlu və ya çap məhsullarını oxumaqla bağlı başqa əlilliyi olan şəxslər üçün əlçatanlığını asanlaşdırmağa dair Mərakeş Müqaviləsi”nə qoşulmaq haqqında” qanunlarda dəyişiklik edilməsi barədə qanun layihəsi ilə bağlı Musa Quliyev məlumat verib. Bildirib ki, dəyişikliklər əsasən termin dəqiqləşdirilməsi ilə bağlıdır və texniki xarakter daşıyır, eyni zamanda əlilliyi olan şəxslərə qarşı diskriminasiya hallarının aradan qaldırılması məqsədilə bəzi ifadələrin daha yumşaq ifadələrlə əvəz olunması təklif edilir.

Qanun layihələrinin müzakirəsində Əmək və sosial siyasət komitəsinin sədri Musa Quliyev, komitənin sədr müavini Məlahət İbrahimqızı, deputatlar Qüdrət Həsənquliyev, Vüqar Bayramov, Soltan Məmmədov, Arzu Nağıyev, Jalə Əliyeva, Əziz Ələkbərov, Sevinc Hüseynova, Aqil Məmmədov çıxış ediblər. Millət vəkilləri pensiya sistemində vahid indeksasiya metodunun təkmilləşdirilməsi, onun tətbiqi meyarları, indeksasiyanın inflyasiya templəri ilə uzlaşdırılması, əmək münasibətlərində qadın hüquqlarının qorunması kimi məsələlərlə bağlı fikirlərini bildiriblər, sənədlərlə bağlı suallarını və qeydlərini səsləndiriblər.

Əmək və əhalinin sosial müdafiəsi nazirinin müavini Anar Kərimov, Əmək və Əhalinin Sosial Müdafiəsi Nazirliyinin Sosial sığorta və pensiya siyasəti şöbəsinin müdiri Elnur Abbasov qaldırılan məsələlərə aydınlıq gətiriblər və millət vəkillərinin suallarını cavablandırıblar.

Müzakirələrin sonunda deputatlar gündəlikdəki qanun layihələrini baxılmaq üçün Milli Məclisin plenar iclasına tövsiyə ediblər.

İclasda deputatlar Ziyad Səmədzadə, İlham Məmmədov və digər rəsmi şəxslər də iştirak ediblər.

Mənsurə Hümbətova

Mətndə səhv var? Onu siçanla seçin və Ctrl+Enter düyməsini basın.
ŞƏRH YAZ
OXŞAR XƏBƏRLƏR

XƏBƏR LENTİ
BÜTÜN XƏBƏRLƏR
Hquq guşəsi
NEKROLOQ

«    Aralık 2022    »
PtSaÇrPrCuCtPz
 1234
567891011
12131415161718
19202122232425
262728293031