SON DƏQİQƏ

Naxçıvan Muxtar Respublikası Rabitə və Yeni Texnologiyalar Nazirliyində keçirilən müşavirəni nazir Vüsal Sevdimaliyev açaraq məruzə ilə çıxış edib.

Naxçıvan Muxtar Respublikası Rabitə  vəYeni Texnologiyalar Nazirliyinin  mətbuat xidmətindən NAXCİVANXEBERLERİ.COM-a verilən məlumata görə, 12 avqust 2020-ci il tarixdə Naxçıvan Muxtar Respublikası 2020-2021-ci illərin payız-qış mövsümünə hazırlıqla bağlı keçirilən müşavirədə digər sahələrlə yanaşı, Naxçıvan Muxtar Respublikası Ali Məclisinin Sədri tərəfindən Naxçıvan Muxtar Respublikası Rabitə və Yeni Texnologiyalar Nazirliyinəyaşayış məntəqələrində sakinlərə kəsintisiz rabitə və internet xidmətlərinin göstərilməsinə diqqətin artırılması, mal-material ehtiyatının yaradılması tapşırıqları verilib.

Qeyd olunub ki, hazırda payız-qış mövsümü ilə bağlı nəzərdə tutulan tədbirlərin icrası davam etdirilir.Nazirliyin anbarında rabitə xətt, abunə qurğuları və fiber-optik sahəsi üzrə kabel ehtiyyatının yaradılması istiqamətində işlər davam etdirilir, istismar edilən bütün elektron qurğuların ehtiyat hissələrinin də yaradılması diqqət mərkəzində saxlanılır. Qeyd olunanlarla yanaşı,payız-qış mövsümünə hazırlıqla bağlı həyata keçirilən tədbirlər  eyni zamanda qazanxana və istilik sistemləri üzrə  ixtisaslı kadrlara olan tələbatı da aktual edir. Bu səbəbdən də  hazırda fəaliyyət göstərən qazanxana işçilərinin ixtisaslarının araşdırılması, bilik səviyyələrinin yoxlanması,  qabaqcadan təlimatlandırılması,  zərurət yarandıqda qazanxana və istilik sistemləri üzrə  yeni ixtisaslı kadrların hazırlanması üçün müvafiq peşə kurslarında onların iştirakının təmin edilməsi, peşə kursu keçmiş və sertifikat almış ocaqçıların işə götürülməsi istiqamətində işlər davam etdirilir.

Vurğulanıb ki, avadanlıqların qorunması məqsədilə bütün mümkün imkanlardan istifadə olunur. Belə ki, birbaşa ümumi elektrik şəbəkəsindən qidalanan bütün avtomat telefon stansiyaları və digər qurğular xüsusi ayırıcı gərginlik releləri ilə təchiz olunub.

Diqqətə çatdırılıb ki, hazırda muxtar respublika üzrə mövcud 213 avtomat telefon stansiyasından 28-i açıq hava tipli, 185-i istilik təminatı olan əsaslı təmir edilmiş və ya yeni istismara verilmiş binalarda yerləşir.

Nazir deyib ki, yaradılmış imkanlardan istifadə edilməklə Rabitə və Yeni Texnologiyalar Nazirliyi 2020-2021-ci illərin payız-qış mövsümünü uğurla başa vuracaq, muxtar respublikada əhalinin nümunəvi rabitə və internet xidmətləri  ilə təmin  olunmasına çalışacaqdır.

Müşavirə məruzə ətrafında çıxışlarla davam edib, 2020-2021-ci illərin payız-qış mövsümünə hazırlıqla bağlı Nazirliyin Tədbirlər planı təsdiq edilib.