SON DƏQİQƏ

Naxçıvan Muxtar Respublikası Şahmat Federasiyasının və Təhsil Nazirliyinin birgə təşkilatçılığı ilə beynəlxalq usta Talıb Babayevin “Naxçıvan premium turniri”, “Debüt tələləri 333” və “Həvəskardan ustaya qədər” (II cild) kitablarının təqdimatı keçirilib.

NAXCİVANXEBERLERİ.COM xəbər verir ki, tədbirdə çıxış edən Naxçıvan Muxtar Respublikası Şahmat Federasiyasının sədr müavini Emin Hacıyev muxtar respublikada şahmatın kütləviliyinin təmin olunması istiqamətində görülən işlərin əhəmiyyətini vurğulayıb. Qeyd edib ki, hər il federasiyanın dəstəyi ilə müxtəlif dərsliklər çap edilərək şahmatçıların istifadəsinə verilir. O diqqətə çatdırıb ki, təqdim edilən hər üç kitab beynəlxalq usta Talıb Babayevin müəllifliyi və tərcüməsi sayəsində ərsəyə gəlib, federasiyanın dəstəyi ilə çap edilib.

Təhsil nazirinin müavini Ovni Muradov çıxış edərək bildirib ki, muxtar respublikada şahmata dair dərsliklərin və metodiki vəsaitlərin işıq üzü görməsi şahmatı kütləvi şəkildə tədris və təbliğ etməyə geniş imkan yaradır, bununla da şahmatçılar daim uğurlu nəticələr əldə edirlər. Təsadüfi deyil ki, bu günə qədər Naxçıvan Şahmat Federasiyasının bir neçə yeniyetmə şahmatçısının adı Naxçıvan Muxtar Respublikası Gənc İstedadlarının “Qızıl kitabı”na daxil edilib. Bunlardan sonuncusu isə Naxçıvan şəhər 5 nömrəli tam orta məktəbin şagirdi Nazlı Hümbətovadır. O.Muradov qeyd edib ki, bütün bunlar muxtar respublikada şahmata və şahmatçılara olan diqqət və qayğının ifadəsidir. Naxçıvanda şahmatın kütləviliyinin təmin edilməsinin və bu sahədə əldə edilən uğurların nəticəsidir ki, muxtar respublikada müntəzəm olaraq şahmat yarışları keçirilir. Bu il isə növbəti şahmat yarışı - 16 yaşadək şahmatçılar arasında olimpiada keçiriləcək.

Tədbirdə Naxçıvan şəhər 16 nömrəli tam orta məktəbin şahmat müəllimi Fəridə Şükürova və Naxçıvan Qarnizonu məktəbinin şahmat müəllimi, federasiyanın məşqçisi Tural Zeynalov çıxış edərək yeni kitabların şahmatın tədrisinin keyfiyyətinin yüksəldilməsinə əsaslı təsir göstərəcəyini bildiriblər.

Sonda rayon şahmat məktəblərinin direktorlarına və müəllimlərə kitablar təqdim edilib.