SON DƏQİQƏ

Müharibədə zəfərin qazanılmasında hərbi qulluqçuların döyüş qabiliyyəti və ruh yüksəkliyi mühüm rol oynayır. Döyüş sınağında əsas olan insan amilidir. Düşmənə qarşı vuruşan döyüşçünün qalibiyyət əzmi onun yenilməzliyinin təməlində dayanan başlıca cəhətdir. Hərb tariximizin şərəfli səhifəsi olan və bizi qələbə zirvəsinə ucaldan 44 günlük Vətən müharibəsində xalqımızın qeyrətli və vətənpərvər oğulları erməni işğalçılarını məğlub etdilər, torpaqlarımızın düşmən tapdağında qalmasına son qoydular, uzun illər qədəmimizin dəymədiyi, nəfəsimizin toxunmadığı, həsrətini çəkdiyimiz yurdlarımızda üçrəngli bayrağımızı qaldırdılar.

Vətən müharibəsində şəhidlik zirvəsinə ucalmış qəhrəman oğulları, qazilərimizin və digər hərbi qulluqçularımızın göstərdikləri igidlik nümunələri heç vaxt unudulmayacaq. Çünki onlar xalqımızın gözlədiyi qələbə gününü reallığa çevirmək üçün öz layiqli töhfələrini veriblər. Elə həmin qəhrəman oğullarımızdan  biri olan Goranboy  rayonunun  701  saylı  hərbi  hissəsinin  tağım  komandiri Hüseyn  Məmmədov keçdiyi döyüş yolu əqidəsinə, içdiyi anda sədaqət, əsl döyüşçü fədakarlığı nümunəsidir.

Hüseyn Şahin oğlu Məmmədov 1991 – ci  ildə  Naxçıvan  şəhərində  anadan  olmuşdur. Orta  təhsilini  1997 – ci  il  14  saylı  məktəbdə  almış,  2018 – 2012 – ci  illərdə  İdman  Akademiyasında  oxumuşdur.  2013 – 2014 – cü  illərdə  Sədərək  “N”  saylı  hərbi  hissədə  həqiqi  hərbi  xidmətə  başlamışdır.  2019 – cu  ildə  təlim – tədris  mərkəzində  zabit  kursunu  bitirmiş  elə  həmin  ildə  də  Goranboy  rayonunda  701  saylı  hərbi  hissədə  tağım  komandiri  kimi  işləmişdir.

2020-ci il sentyabrın 27-də Vətən müharibəsi başlayanda Hüseyn Məmmədovun xidmət etdiyi dəstənin hərbi qulluqçuları döyüşə ilk atılanların sıralarında olublar. Hüseyn bu barədə danışarkən  yolunun Murovdağ yüksəkliyi, Suqovuşan  və  Talış kəndlərinin ərazilərində keçdiyini bildirirdi : “Müharibənin öz çətinlikləri, əzab-əziyyətləri olur. Ağır döyüşlər gedib, yuxusuz gecələrimiz olub, saatlarla yağış altında qalaraq islanmışıq, bir neçə gün paltarımız qurumayıb. Düşmən texnikanı vurduğundan, bəzən təchizatı bizə vaxtında çatdırmaq mümkün olmayıb, ancaq ruhdan düşməmişik, hər hansı çətinlik qarşısında iradəmiz büdrəməyib, daim irəli getmək barədə fikirləşmişik, komandirlərin əmr və tapşırıqlarını tərəddüd etmədən yerinə yetirmişik”. 

Onun sözlərinə görə, hər bir insan kimi, döyüşçü də yaşamaq, öz arzularına qovuşmaq istəyir, özünəməxsus xəyalları olur, ailəsini düşünür. Ancaq müharibə gerçəkliyində dərk edirsən ki, hissə qapılmaq olmaz, qarşıda düşmən var, onun hədəfindəsən, müqəddəs torpağını təcavüzkardan təmizləməlisən, geriyə qalib kimi dönməlisən. Müharibə itkisiz olmur, ölüm bir nəfəs qədər bizə yaxın idi, lakin ölüm qorxusu səni üstələməməlidir, döyüş ruhu varsa, bu, insana mənəvi güc verir. Vətən yolunda şəhid və qazi olmaq isə insan üçün şərəfli taledir.

2020-ci ilin sentyabr ayının 30-da Ağucuq istiqamətində gedən döyüş zamanı düşmən Hüseynin tərkibində olduğu qrupun yerləşdiyi mövqeni müxtəlif növ artilleriyadan, zirehli texnikalardan şiddətli atəşə tutub. Ağır zərbə alan Hüseyn kəllə beyin travması alıb və sağ ayağından yaralanıb. Hal – hazırda II  Qarabağ  qazisi  kimi  bir  ildən  çoxdur  müalicə  alır. 

Hüseyn Şahin oğlu Məmmədov  Azərbaycan  Prezidentinin 2021-ci il 24 iyun tarixli 2720 nömrəli Sərəncamı ilə  “Suqovuşanın  azad  olunmasına  görə”  medalı  ilə  təltif  olunub.

“Vətəndən pay olmaz” deyib, ömrünü Vətənə fəda edən, şəhidlikləri və qaziliklər ilə bizə Zəfər sevinci yaşadan oğullarımız, heç vaxt unudulmayacaqsınız! Allah bütün Şəhidərimizə rəhmət eləsin! Qarabağ Azərbaycandır!

Mənsurə HÜMBƏTOVA