SON DƏQİQƏ

naxcivanxeberleri.com

Zəfərin mübarək, Azərbaycan

Zəfərin mübarək, Azərbaycan
22-05-2022, 15:58

Bir sevgidən danışmaq istəyirəm- Vətən sevgisindən. Dünya boyda, qəlbimizdə beşikdən ta məzaracan yaşayan və heç zaman sönməyən sevgidən. Bizi həyata, doğulduğumuz yurda, elə- obaya bağlayan bir qüdrətdir bu sevgi. Vətən sevgimiz sonsuzdur, böyükdür, çünki Vətən elə bizim özümüzdür. Onun uğruna can verməyə, qan tökməyə hazırıq. Amma bir qədər nisgil vardı bu sevgimizdə.  30 il idi ki, bu Vətənin təməli, özəyi olan  torpaqlarımızın bir hissəsi  işğal altında idi. Deməli sevgimiz də, özümüz də yaralı, nisgilli idik. Məhz buna görə biz 30 il boyu hər gün işğalda olan torpaqlarımızın  acısını,  həsrətini çəkdik. Bu qara tale bizim üçün unudulmaz, hətta utancverici, qara bir tarix idi.  Torpaqlarımızın işğalı təkcə  ərazimizin bütövlüyünə, tamlığına deyil,  milli ruhumuza da böyük zərbə, zədə  vurmuşdu.  Hər birimizin doğulduğu məmləkətdə, kənddə, şəhərdə uşaq ikən evdən məktəbə qədər getdiyimiz  yolda sanki  elə bir bina yox idi ki, şəhid büstü, elə bir həyət yox idi ki, Şəhid bulağı tikilməsin. Kədərli baxışlarla boylanırdı o şəhidlər əbədi həkk olunduqları o şəkillərdən. Təkcə ürəklər deyil, binalar,  həyətlər də yaralı idi...

Amma tarixin ən acı sınaqlarından şərəflə, zəfərlə çıxan Azərbaycan xalqının ürəyində olan Vətən sevgisi bitib tükənmirdi.  Bu acıyla, ağrıyla yaşasa da bir an da olsun onu gələcəyə ümidlə aparan Vətən sevgisini unutmur, onu bir alov kimi daha da gücləndirirdi. Bu güc bir gün bizim olan torpaqların  işğaldan azad olacağının  inamı  idi.  

Bir payız günündə sanki günəş daha parlaq şəfəq saçdı və həmin an gəldi... Artıq neçə il idi ki,  işğalda olan torpaqlarımız  igid oğlanlarımızın, ordumuzun və bu ordunun Müzəffər Ali Baş Komandanının  şücaəti, qətiyyəti  ilə geri alındı. Tariximizə yeni bir Qələbə, Zəfər yazıldı. Amma biz bu qələbəni asan qazanmadıq. 44 gün davam edən  haqq savaşında  qəhrəmanlarımız bir an belə ruhdan düşmədən, geri çəkilmədən, yüksək ruhla mübarizəni davam etdirdilər.

 Budur noyabrın 10-nu,  Azərbaycan xalqı sevinc içindədir. Xalqımız qələbə sevincini  qurur hissi ilə  yaşayır. Onun buna haqqı da var. 30 ildir dözür, savaşır və bir an da olsun o torpaqları unutmur. Nəticədə  Azərbaycan Ordusu və dövləti bütün dünyaya nəyə qadir olduğunu sübut edərək, yeni tarix yazır. Dünyanı heyrətə gətirən bir döyüş tarixi, Şuşa fatehlərinin qəhrəmanlığı artıq dünyanın hərb dərsliklərində yer alıb. Dünənə qədər uşaq, yeniyetmə, “bığ yeri yenicə tərləyən” gənc saydığımız oğullar bir gecənin içində xalq qəhrəmanına çevrildilər. Heç kəsin tarixdən silə bilməyəcəyi Azərbaycan tarixini silahları və hünərləri ilə qələmə aldılar.      

Biz müharibənin davam etdiyi 44 gündə də, böyük Zəfərin  elan olunmasından keçən günlər  ərzində də xalqımızın, ordumuzun nə qədər birlik, necə qüdrətli, hansı gücə malik olduğumuzun şahidinə çevrildik. Artıq bu gün dünyanın hər yerindən gözəl Qarabağın, Şuşanın sorağı gəlir. Ağlaya – ağlaya sevinən analarımızın da dilinin əzbəridir Qarabağ. İndi yollarımız Cıdır düzünəcən  baş alıb gedir.  Müzəffər Ali Baş Komandanımız, mübariz iradəli İlham Əliyevin "dəmir yumruğ"u sayəsində qazandığımız Zəfər əbədi qürurumuzdur. Bir daha təsdiqləndi ki, Azərbaycan xalqı yenilməz xalqdır, Azərbaycan dövləti məğlubedilməz və güclü dövlətdir. Saatın əqrəbləri dayanmadan bizi Qarabağımızın sözün əsl mənasında cənnətə çevriləcəyi  günlərə aparır. Buna görə biz Müzəffər Ali Baş Komandana, onun qüdrətli Ordusuna, qazilərə və  Vətən sevgisiylə ürəkləri əbədi döyünən qəhrəman Şəhidlərə borcluyuq !


Səbinə Əliyeva Jurnalistika ixtisası üzrə III kurs tələbəsi

Mənsurə Hümbətova

Mətndə səhv var? Onu siçanla seçin və Ctrl+Enter düyməsini basın.
ŞƏRH YAZ
OXŞAR XƏBƏRLƏR

XƏBƏR LENTİ
BÜTÜN XƏBƏRLƏR
Hquq guşəsi
NEKROLOQ

«    Haziran 2022    »
PtSaÇrPrCuCtPz
 12345
6789101112
13141516171819
20212223242526
27282930