SON DƏQİQƏ

NAXCİVANXEBERLERİ.COM-a verilən məlumata əsasən, İkinci Qarabağ müharibəsində Azərbaycanın igid oğulları öz qəhrəmanlıqları ilə dastan yazdılar. 30 illik arzumuzu gerçəkləşdirən minlərlə cəsarətli, şücaətli qəhrəman oğullarımız 44 günlük haqq-ədalət mübarizəmizdə şəhidlik zirvəsinə ucaldı. Qələbə sevincini bizə yaşadan Vətən oğulları dövlətimiz tərəfindən ən ali mükafatlarla təltif edildilər. Ölkəmizin ərazi bütövlüyü uğrunda aparılmış döyüş əməliyyatlarında igidlik və şücaət göstərmiş naxçıvanlı hərbi qulluqçular da müxtəlif orden və medallarla mükafatlandırıldı. Naxçıvan Muxtar Respublikası Ali Məclisinin Sədri tərəfindən şəhid ailələrinə və qazilərə mənzillər və avtomobillər təqdim olundu. Qələbəmizin memarı olan, Vətən müharibəsində şəhidlik zirvəsinə ucalan, hər zaman qürurla, ehtiramla anılan Naxçıvanın qəhrəman oğullarının əziz xatirələrinin əbədiləşdirilməsi üçün şəhərimizin Heydər Əliyev prospektində, Möminə xatın abidəsinin yaxınlığında bu ilin mart ayından Naxçıvan Muxtar Respublikası Dövlət Şəhərsalma və Arxitektura Komitəsinin Naxçıvan Şəhər İdarəsi tərəfindən Zəfər Parkı inşa edilməkdədir. Ümumi sahəsi 6400 kvadratmetrdir. Parkın mərkəzində ucaldılmaqda olan Zəfər abidəsi özünəməxsus quruluşu və görkəmi ilə seçilməkdədir. Parkın 640 kvadratmetr ərazisini əhatə edən abidə yerdən 12 metr hündürlükdə olacaq, aypara və səkkizguşəli ulduz şəklində dizayn ediləcəkdir. Bununla yanaşı, parkda kollektiv yürüşlərin təşkili məqsədilə eni 6, uzunluğu 100 metr olacaq geniş yol da salınacaq və ərazidə həmişəyaşıl, dekorativ bitkilər əkiləcək.