SON DƏQİQƏ

Sədərək rayonunda  bütün sahələrin davamlı inkişafı rabitə sahəsini də əhatə edib. Yeni texnologiyaların tətbiqi ilə əlaqədar mühüm layihələr həyata keçirilib.

Naxçıvan Muxtar Respublikası Rabitə və Yeni Texnologiyalar Nazirliyinin mətbuat xidmətindən NAXCİVANXEBERLERİ.COM-a verilən məlumata görə, rayonda əhaliyə nümunəvi rabitə və internet  xidmətləri göstərilir.

Stasionar telefon şəbəkəsinin genişləndirilməsi məqsədilə həyata keçirilən kompleks tədbirlərin nəticəsi olaraq rayon üzrə mövcud avtomat telefon stansiyalarının  nömrə tutumları  artırılmış,  yeni telefon nömrəsi abonentlərin istifadəsinə verilmişdir. Bunlarla yanaşı, rabitə və abunə qurğularında yaranmış nazaslıqların aradan qaldırılması  istiqamətində operativ və zəruri tədbirlər həyata keçirilib,  istismar zamanı sıradan çıxmış avadanlıqlar yeniləri ilə əvəz olunub.

Rayonda yeni fiber-optik xətlər çəkilir və bu xətlər üzərində iritutumlu telekommunikasiya şəbəkələri qurulur. Bunlar da öz növbəsində rabitə əlaqələrinin tam kəsintisiz həyata keçirilməsinə şərait yaradır.

Yeni nəsil rabitə texnologiyalarının qurulması və nəticədə əhalinin dayanıqlı rabitə, yüksəksürətli internet və digər xidmətlərlə təmin olunması istiqamətində işlər davam etdirilir. Rayon sakinlərinin internet xidmətlərinə olan tələbatının təmin edilməsi, eyni zamanda keyfiyyətli, kəsintisiz və çoxçeşidli rabitə xidmətlərinin təşkili məqsədilə bir sıra işlər görülməkdədir. Rayon mərkəzində və kəndlərdə fəaliyyət göstərən yeni nəsil NGN tipli Avtomat Telefon Stansiyalarına internet platası əlavə edilib. Belə ki, Heydərabad qəsəbəsində 1, rayonun Sədərək kəndində 3, Qaraağac kəndində 1, Dəmirçi kəndində 4 ədəd olmaqla, ümumilikdə 9 ədəd 32 yerlik internet platası Avtomat Telefon Stansiyalarına əlavə edilib. Nəticə etibarı ilə  300-ə yaxın internet istifadəçisinin sayının artmasına şərait yaranıb.

Rayon sakinlərinə nümunəvi rabitə xidmətlərinin göstərilməsi istiqamətində həyata keçirilən ardıcıl tədbirlər bundan sonra da davam etdiriləcəkdir.