SON DƏQQƏ

Kütləvi şəkildə yaşıllaşdırma və ekoloji problemlərin həlli indi prioritet məsələdir. Bu sahədə aparılan ardıcıl tədbirlər hesabına Şahbuz rayonunda son dövrlərdə yeni meyvə bağlarının salınması diqqət mərkəzində saxlanılır. Tarixən rayonumuzda meyvəçilik daha çox üstünlük verilən təsərrüfat sahələrindən biri olub.

Çünki dağlıq ərazidə yerləşən bölgəmizdə təmiz hava və su, torpağın münbitliyi meyvəçiliyin inkişafında başlıca amillərdəndir. Belə ünvanlarda yüz illər boyu bu üsullardan səmərəli istifadə olunub, növbənöv meyvə bağları salınıb. İndi bu dağ rayonunda tamam başqa mənzərədir. Meyvə bağları öz yerində, həmişəyaşıl gül və dekorativ ağaclar rayon və eləcə də onun kəndlərinin ərazisini tanınmaz edib. Elə bu günlərdə Sələsüz kəndi ərazisində 3,2 hektar sahədə yeni üzüm bağı salınıb. Əraziyə əlvan üzüm sortlarından 5 minə yaxın üzüm tənəyi əkilib. Rayonda iqtisadi əhəmiyyətə malik üzüm bağlarının salınması hər zaman diqqət mərkəzində saxlanılıb.

Ötən illər ərzində rayon ərazisində 20 hektara yaxın üzüm bağı salınıb. Həmçinin Türkeş kəndindəki 2,5 hektarlıq meyvə bağında da yaşıllaşdırma tədbirləri aparılıb. Bağa bərpa məqsədilə 200 meyvə tingi əkilib. Qeyd edək ki, ağacəkmə kampaniyası 2500 rayon sakininin iştirakı ilə keçirilib. Yaşıllaşdırma tədbirləri hər il olduğu kimi, bu il də uğurla davam etdirilir.

Turanə Baxşəliyeva